Andhra Pradesh, APSRTC, Lockdown

రేపటి నుంచి ఏపీలో బస్సు సర్వీసులు ప్రారంభం

ఆంధ్రప్రదేశ్‌లో రేపటి నుంచి బస్సు సర్వీసులు ప్రారంభం కానున్నాయి. రాష్ట్రంలోని వివిధ నగరాలు, పట్టణాల మధ్య ఓ బస్టాండ్ నుంచి మరో బస్టాండ్ వరకు మాత్రమే బస్సులు నడిపేలా ఏర్పాట్లు చేశారు. అయితే, విశాఖపట్టణం, విజయవాడలలో సిటీ సర్వీసులు ఉండవు. బస్సుల్లో టికెట్లు ఇవ్వరు. బస్టాండ్‌లోనే టికెట్ కొనుగోలు చేసిన తర్వాత థర్మల్ స్క్రీనింగ్ చేస్తారు. అందులో ఫిట్‌గా ఉన్నట్టు తేలితేనే బస్సు ఎక్కేందుకు ప్రయాణికులను అనుమతిస్తారు. అలాగే, ప్రయాణికుడి ఫోన్ నంబరు, గమ్యస్థానం వివరాలు కూడా సేకరిస్తారు.

బస్సు సర్వీసులన్నీ అంతర్ జిల్లాలకే పరిమితం కానున్నాయి. తెలంగాణ, కర్ణాటక వంటి రాష్ట్రాలు అంతర్రాష్ట్ర సర్వీసులకు గ్రీన్ సిగ్నల్ ఇవ్వకపోవడంతో కొంతకాలంపాటు బస్సులు రాష్ట్ర సరిహద్దుల వరకే నడవనున్నాయి. అయితే, ఇతర రాష్ట్రాల్లో చిక్కుకుపోయి స్పందన పోర్టల్‌లో దరఖాస్తు చేసుకున్న వారి కోసం మాత్రం ప్రత్యేక బస్సులు నడపాలని ప్రభుత్వం యోచిస్తోంది.

ఈ బస్సులకు మాత్రం తెలంగాణ ప్రభుత్వం అనుమతి ఇస్తుందని అంటున్నారు. ఈ ప్రత్యేక బస్సులు తెలంగాణలో బయలుదేరి మరెక్కడా ఆగకుండా గమ్యస్థానాన్ని చేరుకుంటాయి. అలాగే, ఆయా బస్సుల్లో వచ్చిన వారికి వైరాలజీ పరీక్షలు నిర్వహిస్తారు. కాగా, 50 శాతం సీట్లకు మాత్రమే టికెట్లు ఇచ్చి ప్యాసింజర్ సర్వీసులు నడపాలని నిర్ణయించిన ఆర్టీసీ కొంతకాలంపాటు చార్జీలను 50 శాతం పెంచాలని నిర్ణయించి ముఖ్యమంత్రికి ప్రతిపాదనలు పంపింది. సీఎం నుంచి అనుమతి లభించిన వెంటనే చార్జీల పెంపును ఖరారు చేస్తారు.
Tags: Andhra Pradesh, APSRTC, Lockdown

India Corona Virus, New Cases, Health Ministry

పరుగులు పెడుతున్న కరోనా… ఒక్కరోజులో 5,600కు పైగా కొత్త కేసులు!

ఇండియాలో కరోనా మహమ్మారి మరింతగా విజృంభించింది. వైరస్ కేసులు వెలుగులోకి వచ్చిన తరువాత, తొలిసారిగా, 24 గంటల వ్యవధిలో 5,600కు పైగా కేసులు నమోదయ్యాయి. మంగళవారం నాడు దేశవ్యాప్తంగా 5,611 కొత్త పాజిటివ్ కేసులు నమోదయ్యాయని, ఇదే సమయంలో 140 మంది ప్రాణాలు వదిలారని కేంద్ర ఆరోగ్య శాఖ అధికారికంగా ప్రకటించింది. దీంతో మొత్తం కేసుల సంఖ్య 1,06,750కి పెరిగాయని, ప్రస్తుతం 61,149 మందికి వివిధ ఆసుపత్రుల్లో చికిత్స జరుగుతోందని పేర్కొంది. ఇప్పటివరకూ 3,303 మంది వైరస్ బారినపడి ప్రాణాలు కోల్పోయారని వెల్లడించింది. నిన్న 3,124 మంది రికవరీ కాగా, మొత్తం డిశ్చార్జ్ అయిన వారి సంఖ్య 42,297కు పెరిగింది. రికవరీ రేటు 39.62 శాతానికి మెరుగుపడింది.
Tags: India Corona Virus, New Cases, Health Ministry

Lockdown Hyderabad, Exemptions, Police Traffic

హైదరాబాద్ లో బారికేడ్లన్నీ తొలగింపు… పూర్తి స్థాయిలో రోడ్డుపైకి వచ్చేసిన వాహనాలు!

దాదాపు 60 రోజుల లాక్ డౌన్ తరువాత హైదరాబాద్ తిరిగి మామూలు స్థాయికి వచ్చినట్టుగా బుధవారం ఉదయం కనిపించింది. రోడ్ల కూడళ్లలో పోలీసులు ఏర్పాటు చేసిన బారికేడ్లు, చెక్ పోస్టులు తొలగిపోయాయి. ప్రజలు ఏ మాత్రం కరోనాపై భయం లేకుండా, తమతమ వాహనాలతో రోడ్లపైకి వచ్చేశారు. వీధుల్లోని షాపులన్నీ తెరచుకున్నాయి. ప్రభుత్వ ఉత్తర్వుల మేరకు మాల్స్ మాత్రం తెరచుకోలేదు. వేల సంఖ్యలో కార్లు, బైక్ లు బయటకు రావడంతో, అన్ని సిగ్నల్స్ వద్దా ట్రాఫిక్ భారీగా కనిపిస్తోంది.

ఇక పోలీసులు అన్ని ట్రాఫిక్ నిబంధనలనూ విధిగా పాటించాలని సూచిస్తున్నారు. ప్రతి ఒక్కరూ మాస్క్ ను ధరించడం తప్పనిసరని, మాస్క్ లేకుంటే రూ. 1000 జరిమానా విధిస్తామని హెచ్చరిస్తున్నారు. ఏ వాహనంలో ప్రయాణించినా, వాహనానికి సంబంధించిన పత్రాలన్నింటినీ దగ్గర ఉంచుకోవాలని, సాయంత్రం 7 గంటల వరకే సడలింపులు ఉంటాయని స్పష్టం చేశారు. ఆ తరువాత బయట తిరిగే వాహనాలపై చట్టపరమైన చర్యలు తీసుకుంటామని ఉన్నతాధికారులు వెల్లడించారు.
Tags: Lockdown Hyderabad, Exemptions, Police Traffic

Odisha, West Bengal, Maharashtra, Shramik Trains, Amphan Cyclone

ఎమ్‌ఫాన్ ఎఫెక్ట్: ఒడిశా, పశ్చిమ బెంగాల్‌కు శ్రామిక్ రైళ్లు రద్దు

సూపర్ సైక్లోన్‌గా మారిన ఎమ్‌ఫాన్ కారణంగా ఒడిశా, పశ్చిమ బెంగాల్ రాష్ట్రాలకు వెళ్లాల్సిన శ్రామిక్ స్పెషల్ రైళ్లను రైల్వే శాఖ నేడు రద్దు చేసింది. నేటి సాయంత్రం పశ్చిమ బెంగాల్-బంగ్లాదేశ్ మధ్య తుపాను తీరం దాటనుండగా.. దాని ప్రభావంతో ఒడిశా, పశ్చిమ బెంగాల్‌లో భారీ వర్షాలు కురుస్తున్నాయి. గాలులు ఉద్ధృతంగా వీస్తున్నాయి.

ఫలితంగా చెట్లు కూలిపోయి విద్యుత్ సరఫరాలో అంతరాయం ఏర్పడింది. దీంతో మరోమార్గం లేక మహారాష్ట్ర నుంచి ఈ రెండు రాష్ట్రాలకు వెళ్లాల్సిన శ్రామిక్ రైళ్లను రద్దు చేస్తున్నట్టు రైల్వే అధికారులు ప్రకటించారు. చంద్‌బలీ, భువనేశ్వర్, బాలాసోర్‌తోపాటు పారదీప్‌లలో గాలులు ప్రచండ వేగంతో వీస్తున్నాయి.
Tags: Odisha, West Bengal, Maharashtra, Shramik Trains, Amphan Cyclone

Junior NTR, Vrama Twitter, Six Pack

ఆ బాడీ ఏంట్రా నాయనా?: ఎన్టీఆర్ పై రామ్ గోపాల్ వర్మ కామెంట్ వైరల్!

ఎన్టీఆర్ పుట్టిన రోజు సందర్భంగా ఆయన వ్యాయామ శిక్షకుడు పెట్టిన సిక్స్ ప్యాక్ ఫోటో ఎంతగా వైరల్ అయిందో అందరికీ తెలిసిందే. దీనిపై దర్శకుడు రామ్ గోపాల్ వర్మ సైతం స్పందించారు. ఈ మేరకు తన ట్విట్టర్ ఖాతాలో ఓ ట్వీట్ పెట్టిన ఆయన, “హాయ్ తారక్. నేను స్వలింగ సంపర్కుడిని కాదన్న సంగతి నీకు బాగా తెలుసు. అయితే ఈ ఫొటోలో నిన్ను చూసిన తరువాత నేను అలా ఉంటే బాగుండేది అనిపిస్తోంది. ఆ బాడీ ఎంట్రా నాయనా” అంటూ ట్వీట్ చేశారు. కాగా, ‘టెంపర్’ సినిమా కోసం సిక్స్ ప్యాక్ చేసిన ఎన్టీఆర్, ఇప్పుడు మరోసారి మరింత ఫిట్ గా కనిపిస్తూ ఉండటంతో ఫ్యాన్స్ తెగ ఖుషీ అవుతున్నారు. వర్మ పెట్టిన కామెంట్ వైరల్ అవుతోంది.
Tags: Junior NTR, Vrama Twitter, Six Pack

Katedan, Leopard, Hyderabad

ఇంకా కనిపించని చిరుత.. భయంభయంగా కాటేదాన్ వాసులు

రంగారెడ్డి జిల్లా మైలార్‌దేవ్‌పల్లి సమీపంలోని కాటేదాన్ అండర్ బ్రిడ్జి రోడ్డుపై నిన్న ఉదయం కనిపించి, పట్టుకునే క్రమంలో మాయమైన చిరుత ఆచూకీ ఇప్పటికీ లేకపోవడంతో ప్రజలు ఆందోళన చెందుతున్నారు. దానిని బంధించేందుకు నిన్నటి నుంచి అటవీ, జూ అధికారులు చేస్తున్న ప్రయత్నాలు ఫలించడం లేదు. మాయమైన చిరుత కోసం 20 ట్రాప్ కెమెరాలు ఏర్పాటు చేశారు. నాలుగుసార్లు డ్రోన్ కెమెరాలతో గాలింపు జరిపారు. 2 మేకలను ఎరగా వేశారు. 10 శునకాలను అడవిలోకి పంపారు.. అయినప్పటికీ చిరుత జాడ మాత్రం కనిపించకపోవడంతో సమీప గ్రామాల ప్రజలు భయంతో వణికిపోతున్నారు.

చిరుత ఫామ్ హౌస్ వెనక ఉన్న చెట్టుపై నక్కి ఉంటుందని అటవీ శాఖ అధికారులు అనుమానిస్తున్నారు. అలాగే, శంషాబాద్‌ ఎయిర్‌పోర్టు రోడ్డులో పెట్రోలు బంకుల యజమానులు, వివిధ దుకాణదారులు ఏర్పాటు చేసిన సీసీటీవీ కెమెరాలను పరిశీలిస్తున్నారు. తెల్లవారుజామున 5 గంటల ప్రాంతంలో గగన్‌పహాడ్ పెట్రోలు బంకు వద్ద వీధికుక్కలు గుంపుగా తరుముతున్న దృశ్యాలను అధికారులు గుర్తించారు. కుక్కలు తరుముతున్నది చిరుతనే అయి ఉండొచ్చని భావిస్తున్నారు. దీంతో అధికారులు ఆ ప్రాంతానికి చేరుకుని గాలిస్తున్నారు.
Tags: Katedan, Leopard, Hyderabad

Suman Kumar,CBI,Mallya,Vijay Mallya,Extradition

విజయ్ మాల్యాపై ఉచ్చు బిగించిన టాప్ కాప్… పట్టు వదలని విక్రమార్కుడు సుమన్ కుమార్! 

సీబీఐ అధికారిగా మూడు సంవత్సరాల పాటు ఆయన పడిన శ్రమ ఫలించింది. ఇండియాలోని బ్యాంకులను వేల కోట్లు ముంచేసి బ్రిటన్ పారిపోయిన యూబీ గ్రూప్ మాజీ చైర్మన్ విజయ్ మాల్యా ముందు ఉన్న అన్ని దారులూ మూసుకుపోయి, ఇంక ఇండియాకు వచ్చి, జైలు జీవితం గడపక తప్పనిసరి పరిస్థితి నెలకొందంటే, అది సుమన్ కుమార్ శ్రమ, చూపిన పట్టుదల, సేకరించిన కచ్చితమైన సాక్ష్యాలేననడంలో సందేహం లేదు. బ్యాంకులను మోసం చేసిన కేసులో తనను అప్పగించరాదని విజయ్ మాల్యా పెట్టుకున్న పిటిషన్ ను, గురువారం నాడు యూకే సుప్రీంకోర్టు తోసిపుచ్చింది. దీంతో ఆయన్ను 28 రోజుల్లోగా యూకే నుంచి పంపించేయాల్సిన పరిస్థితి.

ఐడీబీఐ బ్యాంకును రూ. 900 కోట్లకు మోసం చేయడం, స్టేట్ బ్యాంక్ ఆఫ్ ఇండియా నేతృత్వంలోని బ్యాంకుల కన్సార్టియంను రూ. 9 వేల కోట్లకు పైగా మోసం చేసిన కేసుల్లో విచారణ ఆద్యంతం సుమన్ కుమార్ ఆధ్వర్యంలోనే జరిగింది. మాల్యా లండన్ పారిపోయిన తరువాత, ఆయన అక్కడి నుంచి మరో ప్రాంతానికి వెళ్లలేదు గానీ, సుమన్ కుమార్ మాత్రం పలుమార్లు ఇండియా నుంచి లండన్ వెళ్లి రావాల్సి వచ్చింది. 2015 అక్టోబర్ లో ముంబైలోని బ్యాంకింగ్ ఫ్రాడ్స్ విభాగంలో డీఎస్పీగా ఉన్న సుమన్ కుమార్ టేబుల్ పైకి మాల్యా ఫైల్ చేరగా, అప్పటి నుంచి ఆయన ఎంతో శ్రమించారు. ప్రస్తుతం సీబీఐలో అదనపు సూపరింటెండెంట్ గా విధులు నిర్వర్తిస్తున్న ఏభై ఐదేళ్ల సుమన్ కుమార్, దాదాపు మూడేళ్ల తన కృషికి తగ్గా ఫలితాన్ని ఇప్పుడు పొందారు.

ఇక విజయ్ మాల్యా పతనం ఆయన రాజ్యసభ సభ్యుడిగా ఉన్న సమయంలోనే ప్రారంభమైంది. కింగ్ ఫిషర్ ఎయిర్ లైన్స్ సంస్థ తీవ్ర నష్టాల్లో కూరుకుపోయి, ఉద్యోగులకు వేతనాలను ఇవ్వలేకపోతోందని బయటకు తెలిసిన తరువాత, మాల్యాపై మీడియా ఒత్తిడి పెరిగింది. అదే సమయంలో బ్యాంకులకు కట్టాల్సిన బకాయిల విషయమూ బహిర్గతమైంది.

అయితే, కేసును విచారిస్తున్న సీబీఐ ముందు విచిత్రమైన పరిస్థితి. ఏ బ్యాంకు కూడా అప్పటివరకూ మాల్యా రుణాల ఎగవేతపై ఫిర్యాదు చేయలేదు. దీంతో విచారణలో ఎలా ముందుకు సాగాలో తెలియని పరిస్థితి. తమ వద్ద ఉన్న సమాచారం మేరకే కేసులో ముందుకు సాగిన సుమన్ కుమార్, ఐడీబీఐ బ్యాంకును రూ. 900 కోట్లు ముంచేసినట్టు తొలి కేసును రిజిస్టర్ చేశారు. దీంతో విచారణ వేగవంతమైంది. మిగతా బ్యాంకులూ కేసులు పెట్టాయి.

23 ఏళ్ల వయసులో సబ్ ఇనస్పెక్టర్ హోదాలో విధుల్లో చేరిన సుమన్ కుమార్ కు వైట్ కాలర్ నేరాలను విచారించడంలో అద్భుతమైన రికార్డుంది. 2002లో ఆయన బెస్ట్ ఇన్వెస్టిగేటింగ్ ఆఫీసర్ గా గోల్డ్ మెడల్ నూ అందుకున్నారు. 2008లో పోలీస్ మెడల్ ను, 2013లో ఔట్ స్టాండింగ్ ఇన్వెస్టిగేటర్ గా రాష్ట్రపతి పురస్కారాన్నీ స్వీకరించారు. ఆయనకున్న సర్వీస్ రికార్డే, మాల్యా కేసును 2015లో ఆయన టేబుల్ పైకి చేర్చింది. ఈ కేసు విచారణ దశలో ఒక్కో లొసుగూ బయటపడుతూ ఉండగానే, విషయం అర్థం చేసుకున్న మాల్యా, 2016లో దేశం నుంచి పారిపోయారు.

ఆ సమయంలో సీబీఐపైనా విమర్శలు వచ్చాయి. మాల్యా పారిపోవడానికి ప్రభుత్వం సహకరించిందన్న ఆరోపణలూ వెల్లువెత్తాయి. దీంతో సీబీఐ స్పెషల్ ఇన్వెస్టిగేషన్ టీమ్ ను ఏర్పాటు చేసి, అదనపు డైరెక్టర్ రాకేశ్ ఆస్థానాకు బాధ్యతలు అప్పగించగా, ఆయన సుమన్ కుమార్ తో కలిసి కేసును ముందుకు తీసుకెళ్లారు. లండన్ కోర్టుల్లో పిటిషన్లు వేసినప్పటి నుంచి వీరు, ఒక్క విచారణకు కూడా గైర్హాజరు కాలేదు. వెస్ట్ మినిస్టర్స్ కోర్టు నుంచి సుప్రీంకోర్టు వరకూ తమ వద్ద ఉన్న ఆధారాలతో మాల్యా దోషేనని నిరూపించేందుకు ప్రయత్నించి, విజయవంతం అయ్యారు. ఇప్పుడు సుమన్ కుమార్ కృషికి సీబీఐ ఉన్నతాధికారుల నుంచి ప్రశంసల వర్షం కురుస్తోంది.
Tags: Suman Kumar,CBI,Mallya,Vijay Malya,Extradition

TS, RTC, Buses, Corona Virus, Social Distancing, New Seating

ఏ బస్సులో సీటింగ్ ఎలా ఉంటుంది?… టీఎస్ ఆర్టీసీ ప్రతిపాదనలు ఇవే!

ఏపీఎస్ ఆర్టీసీ బస్సులు రేపటి నుంచి తెలంగాణ రాజధాని నుంచి పరుగులు పెట్టనున్నాయి. కరోనా నేపథ్యంలో దాదాపు 8 వారాల నుంచి తిరగని బస్సులు రోడ్లపైకి రానుండటంతో, తెలంగాణ ఆర్టీసీ సైతం స్పందించింది. కనీసం సంవత్సరం పాటు లేదా కరోనాకు వాక్సిన్ వచ్చేంత వరకూ భౌతికదూరం పాటించడం తప్పనిసరైన పరిస్థితుల్లో, తగు జాగ్రత్తలు తీసుకుని ఆర్టీసీ బస్సులను నడిపించాలని భావిస్తూ, అందుకోసం ప్రతిపాదనలు సిద్ధం చేసింది.

సూపర్ లగ్జరీ బస్సుల్లో అటూ ఇటూ ఉండే రెండేసి సీట్ల స్థానంలో ఒక్కో సీటు ఉంచి, మధ్య వరుసలో మరో సీటును అమర్చి నమూనా బస్ ను సిద్ధం చేశారు. సీఎం కేసీఆర్ అంగీకరిస్తే, మిగతా అన్ని బస్సులనూ ఇదే విధంగా మారుస్తారు. ఇక ఎక్స్ ప్రెస్, పల్లెవెలుగు బస్సుల విషయానికి వస్తే, ఈ బస్సుల్లో ఓ వైపు మూడు సీట్లు, మరోవైపు రెండు సీట్లు ఉంటాయి. అంటే, వరుసకు ఐదుగురు కూర్చోవచ్చు. ఐదుగురి స్థానంలో ఇద్దరే కూర్చునేలా నిబంధనలను మారుస్తున్నారు. ఈ బస్సుల్లో సీట్లను మార్చకుండా జిగ్ జాగ్ పద్ధతిలో ప్రయాణికులను అనుమతిస్తారు.

అంటే, తొలి వరుసలో మూడు సీట్లున్న లైన్ లో ఒకరు కిటికీ పక్కన కూర్చుంటే, రెండు సీట్లున్న చోట కూర్చునే వ్యక్తి, కిటికీ పక్కన ఉండరాదు. ఇక రెండో లైన్ లో కుడి వైపున్న వ్యక్తి కిటికీ పక్కన కూర్చుంటే, మూడు సీట్లుండే స్థానంలోని వ్యక్తి కిటికీ పక్కన ఉండకుండా నిబంధనలు మారుస్తున్నారు. ఇలా చేస్తే ప్రయాణికుల మధ్య భౌతిక దూరం కనీసం మీటరు వరకూ ఉంటుందని అధికారులు తేల్చారు.

ఇక సిటీ బస్సుల విషయానికి వస్తే, నిలబడి ప్రయాణించడాన్ని రద్దు చేస్తూ, సీటుకు ఒకరే ఉండేలా చూడాలని ప్రతిపాదించారు. దీని అమలు కాస్తంత కష్టమే అయినా, ఎలాగైనా అమలు చేయాలని ఆర్టీసీ భావిస్తోంది.

వాస్తవానికి తెలంగాణలో హైదరాబాద్, మేడ్చల్, రంగారెడ్డి మినహా మిగతా ప్రాంతాలన్నీ దాదాపు గ్రీన్ జోన్ లోనే ఉండగా, కేంద్రం నుంచి అనుమతులు లభించి, కేసీఆర్ పచ్చజెండా ఊపగానే బస్సులను ప్రారంభిస్తామని, ఇదే సమయంలో గ్రీన్ జోన్లలో ఆటోలు, క్యాబ్ లకు కూడా పరిమితులతో కూడిన అనుమతులు లభించే అవకాశాలు ఉన్నాయని అధికారులు అంటున్నారు.
Tags: TS, RTC, Buses, Corona Virus, Social Distancing, New Seating

Uber, Corona Virus, Employees

3700 మంది ఉద్యోగులను తొలగించిన ఉబెర్

కరోనా వైరస్ లాక్‌డౌన్ నేపథ్యంలో నష్టాలపాలవుతున్న సంస్థలు ఉద్యోగులను దారుణంగా తొలగిస్తున్నాయి. కోవిడ్-19 మహమ్మారి కారణంగా ఎదురవుతున్న సవాళ్లను అధిగమించేందుకు చాలా సంస్థలు తమ ఉద్యోగులను చాలా వరకు తొలగిస్తున్నాయి. తాజాగా ట్యాక్సీ రైడింగ్ యాప్ ఉబెర్ కూడా అదే బాటపట్టింది. వీడియో కాన్ఫరెన్సింగ్ యాప్ జూమ్ ద్వారా నిన్న 3700 మంది ఉద్యోగులతో మాట్లాడిన ఆ సంస్థ కస్టమర్ సర్వీస్ హెడ్ రఫిన్ చావెలీ.. సంస్థలో వారికి ఇదే చివరి రోజుని, అందరినీ ఉద్యోగాల్లోంచి తొలగిస్తున్నట్టు చెప్పారు.

కేవలం మూడు నిమిషాలపాటు సాగిన ఈ కాల్‌ ద్వారా తమ ఉద్యోగుల్లో 14 శాతం మందిని తొలగించడంపై ఉద్యోగులు మండిపడుతున్నారు. ముందస్తు నోటీసు లేకుండా, అందరికీ ఒకేసారి కాల్ చేసి తొలగించడం ఏంటని ప్రశ్నిస్తున్నారు. కాగా, కరోనా మహమ్మారి ప్రభావం ఉబెర్‌పై తీవ్రంగా పడింది. ఈ ఏడాది తొలి త్రైమాసికంలో ఉబెర్ 2.9 బిలియన్ డాలర్ల నికర నష్టాన్ని మూటగట్టుకుంది.
Tags: Uber, Corona Virus, Employees

Pavan Kalyan, Trivikram, Srinivas Venu ,Sriram

పవన్ కోసం కథ రెడీ చేసిన త్రివిక్రమ్

పవన్ కల్యాణ్ – త్రివిక్రమ్ మధ్య మంచి సాన్నిహిత్యం వుంది. ఈ ఇద్దరి కాంబినేషన్లో మూడు సినిమాలు రాగా, వాటిలో రెండు సినిమాలు భారీ విజయాలను అందుకున్నాయి. నాలుగు సినిమా రావడానికి కూడా చాలా అవకాశాలు ఉన్నాయని చెప్పుకుంటున్నారు. పవన్ కల్యాణ్ కోసం త్రివిక్రమ్ ఒక కథను సిద్ధం చేసి ఆయనకి వినిపించడం .. ఆయన గ్రీన్ సిగ్నల్ ఇవ్వడం జరిగిపోయాయట.

ప్రస్తుతం వేణు శ్రీరామ్ దర్శకత్వంలో ‘వకీల్ సాబ్’ చేస్తున్న పవన్, ఆ తరువాత సినిమాను క్రిష్ దర్శకత్వంలో చేయనున్నాడు. ఇక ఎన్టీఆర్ హీరోగా త్రివిక్రమ్ ఒక ప్రాజెక్టును పట్టాలెక్కించనున్నాడు. ఈ రెండు సినిమాలు విడుదల తరువాత, పవన్ – త్రివిక్రమ్ ప్రాజెక్టు సెట్స్ పైకి వెళుతుందని చెబుతున్నారు. పవన్ – త్రివిక్రమ్ కాంబినేషన్లో రానున్న సినిమా కోసం ఎంతో ఆత్రుతగా ఎదురుచూస్తున్న అభిమానులకు ఇది ఒక శుభవార్తేనని చెప్పాలి. ఈ ప్రాజెక్టుకు సంబంధించిన మిగతా వివరాలు తవరలోనే తెలియనున్నాయి.
Tags: Pavan Kalyan, Trivikram, Srinivas Venu ,Sriram