శ్రీరాంసాగర్ జలాశయంలో ప్రస్తుతం 30 టీఎంసీల నీరుందని, ఇదివరకే ఎల్‌ఎండీ (లోయర్ మానేరు డ్యాం) ఎగువన ఉన్న ఆయకట్టుకు నీరందించామని, ఈ నెల పదో తేదీ నుంచి ఎల్‌ఎండీ దిగువకు 10 టీఎంసీల నీటిని విడుదల చేస్తామని మాజీ మంత్రి, హుజూరాబాద్ ఎమ్మెల్యే ఈటల రాజేందర్ స్పష్టం చేశారు. ఎల్‌ఎండీ ఎగువన నాలుగు తడులుగా 20 టీఎంసీల నీటిని అందించనుండగా.. దిగువన ఉన్న ఆయకట్టుకు రెండు తడుల కింద నాలుగు టీఎంసీలు ఇస్తామని తెలిపారు. ఎస్సారెస్పీ కింద వాస్తవానికి 14.40 లక్షల ఎకరాల ఆయకట్టు ఉండగా.. సమైక్య పాలకులు ఏనాడూ ఐదు లక్షల ఎకరాలకు మించి సాగునీరు అందించలేదని పేర్కొన్నారు. ఎస్సారెస్పీ పునర్జీవ పథకం, కాకతీయ కాల్వ ఆధునీకరణ.. తదితర పనుల పురోగతిపై సమీక్షించేందుకుగాను బుధవారం జలసౌధలో పలువురు ప్రజాప్రతినిధులు, నీటిపారుదలశాఖ అధికారులు భేటీ అయ్యారు. పనుల పురోగతిపై సమగ్రంగా చర్చించారు. ఈ సందర్భంగా ఈటల రాజేందర్ మీడియాతో మాట్లాడుతూ.. ఎస్సారెస్పీ ఆయకట్టు పరిధిలో చివరి భూముల వరకు ప్రతి ఎకరాకూ నీళ్లందించేందుకు యుద్ధప్రాతిపదికన పనులు పూర్తిచేయాలని అధికారులకు సూచించామన్నారు.
ఇందు కోసం డిస్ట్రిబ్యూటరీలనూ బలోపేతం చేసుకుంటున్నట్టు చెప్పారు. అధికారికంగా చెరువులు, కుంటలు నింపాలని సీఎం కేసీఆర్ సూచించారని తెలిపారు. దీంతో భూగర్భజలాలు, మత్స్య సంపద పెరుగుతుందని ఈటల చెప్పారు. జూన్ 30 వరకు కేటాయించిన నిధులన్నీ ఖర్చు చేయడంతో పాటు అవసరమైతే అదనపు నిధులు కూడా తెచ్చుకుంటామని స్పష్టం చేశారు. ఎండాకాలంలో రైతాంగానికి నీళ్లు ఇచ్చేందుకు కృషి చేస్తున్నామని తెలిపారు. కొన్నిచోట్ల భూసేకరణలో ఉన్న సమస్యలను పరిష్కరిస్తామని చెప్పారు. సమావేశం అనంతరం మాజీ మంత్రి ఈటల రాజేందర్ సమావేశపు సమగ్ర నివేదికను ముఖ్యమంత్రి కే చంద్రశేఖర్‌రావుకు సమర్పించారు. సమావేశంలో ఎంపీ వినోద్‌కుమార్, ఎమ్మెల్యేలు జగదీశ్‌రెడ్డి, ఎర్రబెల్లి దయాకర్‌రావు, వొడితెల సతీశ్ కుమార్, రామలింగారెడ్డి, రసమయి బాలకిషన్, ఆరూరి రమేశ్, సీతక్క, తెలంగాణ ఇరిగేషన్ డెవలప్‌మెంట్ కార్పొరేషన్ చైర్మన్ ఈద శంకర్‌రెడ్డి, నీటిపారుదలశాఖ ఈఎన్సీలు మురళీధర్‌రావు, నాగేంద్రరావు, అనిల్‌కుమార్, ఎస్‌ఈలు శంకర్, హరిరాం తదితరులు పాల్గొన్నారు.
