Flight Crash, Pakistan, Karachi

కరాచీ విమాన ప్రమాదం.. మేడే, మేడే.. పైలట్ చివరి మాటలు ఇవే!

పాకిస్థాన్‌లో నిన్న జరిగిన విమాన ప్రమాదానికి ముందు తాము ఆపదలో ఉన్నామంటూ పైలట్ పంపిన హెచ్చరికలకు సంబంధించిన కాక్‌పిట్ సంభాషణ వెలుగులోకి వచ్చింది. విమానం క్రాష్ కావడానికి ముందు పైలట్, ఎయిర్ ట్రాఫిక్ కంట్రోల్ (ఏటీసీ) మధ్య జరిగిన సంభాషణ ఫ్లైట్ ట్రాకింగ్ వెబ్‌సైట్ ‘లైవ్ఏటీసీ.నెట్’లో ప్రత్యక్షమైంది. ఆ సంభాషణ ప్రకారం.. తాము ప్రమాదంలో ఉన్నామని చెప్పేందుకు ‘మేడే, మేడే, మేడే’ అనే సందేశాన్ని పైలట్ ఏటీసీకి పంపాడు. ఆ వెంటనే రాడార్‌తో సంబంధాలు తెగిపోయి విమానం కూలిపోయింది.

తొలుత పైలట్ విమానం అప్రోచ్ అవుతున్నట్టు ఏటీసీకి తెలిపాడు. అందుకు ఏటీసీ నుంచి గ్రీన్ సిగ్నల్ వచ్చింది. దీంతో మేం ఎడమవైపునకు తిరగాలా? అని పైలట్ మళ్లీ ప్రశ్నించాడు. దీనికి ఏటీసీ నుంచి ‘అవును’ అని గ్రీన్ సిగ్నల్ వచ్చింది. అయితే, విమానం రెండు ఇంజిన్లు దెబ్బతిన్నాయని, తాము నేరుగా వెళ్తున్నామని పైలట్ మళ్లీ చెప్పాడు. దీంతో స్పందించిన ఏటీసీ బెల్లీ ల్యాండింగ్‌కు కనుక సిద్ధపడితే కన్ఫామ్ చేయాలని కోరింది.

అంతేకాదు, ల్యాండింగ్‌కు 2, 5 రన్‌వేలు సిద్ధంగా ఉన్నాయని చెప్పింది. అర్థం కావడం లేదని చెప్పిన పైలట్.. ‘మేడే, మేడే, మేడే’ అంటూ తాము ప్రమాదంలో ఉన్నామన్న సంకేతాన్ని పంపాడు. అనంతరం సంభాషణ తెగిపోయింది.

ఆ తర్వాత కొన్ని క్షణాలకే విమానం ఓ మొబైల్ టవర్‌ను ఢీకొట్టి జనావాసాల్లో కుప్పకూలింది. రెండు రన్‌వేలు సిద్ధంగా ఉన్నాయని చెప్పినా పైలట్ గో-రౌండ్ (గాల్లో చక్కర్లు కొట్టేందుకే) మొగ్గు చూపాడని ఏటీసీ అధికార ప్రతినిధి అబ్దుల్లా హెచ్.ఖాన్ తెలిపారు.
Tags: Flight Crash, Pakistan, Karachi

Ayodhya Ram Mandir Idols Rama Janma Bhumi Shivling Pillars

ఆయోధ్య రామజన్మభూమి వద్ద బయటపడిన శివలింగం

దశాబ్దాల తరబడి నలిగిన అయోధ్య రామజన్మభూమి వివాదం సుప్రీంకోర్టు తీర్పుతో సమసిపోయిన సంగతి తెలిసిందే. ఈ నేపథ్యంలో, అయోధ్యలోని రామజన్మభూమి వద్ద నిర్మాణ పనులు జరుగుతుండగా అందరినీ ఆశ్చర్యంలో ముంచెత్తుతూ అక్కడో శివలింగం లభ్యమైంది. ఈ శివలింగం ఎత్తు ఐదు అడుగులు ఉన్నట్టు గుర్తించారు.

రామజన్మభూమిలో గత కొన్నిరోజులుగా భూమి చదును చేసే కార్యక్రమం జరుగుతోంది. ఈ క్రమంలో అక్కడి శిథిలాలను తొలగిస్తుండగా, శివలింగంతో పాటు 7 నల్లరాతి స్తంభాలు, 6 ఎర్రరాతి స్తంభాలు, ఓ కలశం, విరిగిపోయిన స్థితిలో మరికొన్ని దేవతామూర్తుల విగ్రహాలు బయటపడ్డాయి. ఇటీవలే అక్కడ పూర్ణకుంభం కూడా బయల్పడిందని వీహెచ్ పీ నేత వినోద్ భన్సల్ తెలిపారు.
Tags: Ayodhya Ram Mandir Idols Rama Janma Bhumi Shivling Pillars

India Corona Virus, New Cases, Health Ministry

పరుగులు పెడుతున్న కరోనా… ఒక్కరోజులో 5,600కు పైగా కొత్త కేసులు!

ఇండియాలో కరోనా మహమ్మారి మరింతగా విజృంభించింది. వైరస్ కేసులు వెలుగులోకి వచ్చిన తరువాత, తొలిసారిగా, 24 గంటల వ్యవధిలో 5,600కు పైగా కేసులు నమోదయ్యాయి. మంగళవారం నాడు దేశవ్యాప్తంగా 5,611 కొత్త పాజిటివ్ కేసులు నమోదయ్యాయని, ఇదే సమయంలో 140 మంది ప్రాణాలు వదిలారని కేంద్ర ఆరోగ్య శాఖ అధికారికంగా ప్రకటించింది. దీంతో మొత్తం కేసుల సంఖ్య 1,06,750కి పెరిగాయని, ప్రస్తుతం 61,149 మందికి వివిధ ఆసుపత్రుల్లో చికిత్స జరుగుతోందని పేర్కొంది. ఇప్పటివరకూ 3,303 మంది వైరస్ బారినపడి ప్రాణాలు కోల్పోయారని వెల్లడించింది. నిన్న 3,124 మంది రికవరీ కాగా, మొత్తం డిశ్చార్జ్ అయిన వారి సంఖ్య 42,297కు పెరిగింది. రికవరీ రేటు 39.62 శాతానికి మెరుగుపడింది.
Tags: India Corona Virus, New Cases, Health Ministry

Odisha, West Bengal, Maharashtra, Shramik Trains, Amphan Cyclone

ఎమ్‌ఫాన్ ఎఫెక్ట్: ఒడిశా, పశ్చిమ బెంగాల్‌కు శ్రామిక్ రైళ్లు రద్దు

సూపర్ సైక్లోన్‌గా మారిన ఎమ్‌ఫాన్ కారణంగా ఒడిశా, పశ్చిమ బెంగాల్ రాష్ట్రాలకు వెళ్లాల్సిన శ్రామిక్ స్పెషల్ రైళ్లను రైల్వే శాఖ నేడు రద్దు చేసింది. నేటి సాయంత్రం పశ్చిమ బెంగాల్-బంగ్లాదేశ్ మధ్య తుపాను తీరం దాటనుండగా.. దాని ప్రభావంతో ఒడిశా, పశ్చిమ బెంగాల్‌లో భారీ వర్షాలు కురుస్తున్నాయి. గాలులు ఉద్ధృతంగా వీస్తున్నాయి.

ఫలితంగా చెట్లు కూలిపోయి విద్యుత్ సరఫరాలో అంతరాయం ఏర్పడింది. దీంతో మరోమార్గం లేక మహారాష్ట్ర నుంచి ఈ రెండు రాష్ట్రాలకు వెళ్లాల్సిన శ్రామిక్ రైళ్లను రద్దు చేస్తున్నట్టు రైల్వే అధికారులు ప్రకటించారు. చంద్‌బలీ, భువనేశ్వర్, బాలాసోర్‌తోపాటు పారదీప్‌లలో గాలులు ప్రచండ వేగంతో వీస్తున్నాయి.
Tags: Odisha, West Bengal, Maharashtra, Shramik Trains, Amphan Cyclone

Suman Kumar,CBI,Mallya,Vijay Mallya,Extradition

విజయ్ మాల్యాపై ఉచ్చు బిగించిన టాప్ కాప్… పట్టు వదలని విక్రమార్కుడు సుమన్ కుమార్! 

సీబీఐ అధికారిగా మూడు సంవత్సరాల పాటు ఆయన పడిన శ్రమ ఫలించింది. ఇండియాలోని బ్యాంకులను వేల కోట్లు ముంచేసి బ్రిటన్ పారిపోయిన యూబీ గ్రూప్ మాజీ చైర్మన్ విజయ్ మాల్యా ముందు ఉన్న అన్ని దారులూ మూసుకుపోయి, ఇంక ఇండియాకు వచ్చి, జైలు జీవితం గడపక తప్పనిసరి పరిస్థితి నెలకొందంటే, అది సుమన్ కుమార్ శ్రమ, చూపిన పట్టుదల, సేకరించిన కచ్చితమైన సాక్ష్యాలేననడంలో సందేహం లేదు. బ్యాంకులను మోసం చేసిన కేసులో తనను అప్పగించరాదని విజయ్ మాల్యా పెట్టుకున్న పిటిషన్ ను, గురువారం నాడు యూకే సుప్రీంకోర్టు తోసిపుచ్చింది. దీంతో ఆయన్ను 28 రోజుల్లోగా యూకే నుంచి పంపించేయాల్సిన పరిస్థితి.

ఐడీబీఐ బ్యాంకును రూ. 900 కోట్లకు మోసం చేయడం, స్టేట్ బ్యాంక్ ఆఫ్ ఇండియా నేతృత్వంలోని బ్యాంకుల కన్సార్టియంను రూ. 9 వేల కోట్లకు పైగా మోసం చేసిన కేసుల్లో విచారణ ఆద్యంతం సుమన్ కుమార్ ఆధ్వర్యంలోనే జరిగింది. మాల్యా లండన్ పారిపోయిన తరువాత, ఆయన అక్కడి నుంచి మరో ప్రాంతానికి వెళ్లలేదు గానీ, సుమన్ కుమార్ మాత్రం పలుమార్లు ఇండియా నుంచి లండన్ వెళ్లి రావాల్సి వచ్చింది. 2015 అక్టోబర్ లో ముంబైలోని బ్యాంకింగ్ ఫ్రాడ్స్ విభాగంలో డీఎస్పీగా ఉన్న సుమన్ కుమార్ టేబుల్ పైకి మాల్యా ఫైల్ చేరగా, అప్పటి నుంచి ఆయన ఎంతో శ్రమించారు. ప్రస్తుతం సీబీఐలో అదనపు సూపరింటెండెంట్ గా విధులు నిర్వర్తిస్తున్న ఏభై ఐదేళ్ల సుమన్ కుమార్, దాదాపు మూడేళ్ల తన కృషికి తగ్గా ఫలితాన్ని ఇప్పుడు పొందారు.

ఇక విజయ్ మాల్యా పతనం ఆయన రాజ్యసభ సభ్యుడిగా ఉన్న సమయంలోనే ప్రారంభమైంది. కింగ్ ఫిషర్ ఎయిర్ లైన్స్ సంస్థ తీవ్ర నష్టాల్లో కూరుకుపోయి, ఉద్యోగులకు వేతనాలను ఇవ్వలేకపోతోందని బయటకు తెలిసిన తరువాత, మాల్యాపై మీడియా ఒత్తిడి పెరిగింది. అదే సమయంలో బ్యాంకులకు కట్టాల్సిన బకాయిల విషయమూ బహిర్గతమైంది.

అయితే, కేసును విచారిస్తున్న సీబీఐ ముందు విచిత్రమైన పరిస్థితి. ఏ బ్యాంకు కూడా అప్పటివరకూ మాల్యా రుణాల ఎగవేతపై ఫిర్యాదు చేయలేదు. దీంతో విచారణలో ఎలా ముందుకు సాగాలో తెలియని పరిస్థితి. తమ వద్ద ఉన్న సమాచారం మేరకే కేసులో ముందుకు సాగిన సుమన్ కుమార్, ఐడీబీఐ బ్యాంకును రూ. 900 కోట్లు ముంచేసినట్టు తొలి కేసును రిజిస్టర్ చేశారు. దీంతో విచారణ వేగవంతమైంది. మిగతా బ్యాంకులూ కేసులు పెట్టాయి.

23 ఏళ్ల వయసులో సబ్ ఇనస్పెక్టర్ హోదాలో విధుల్లో చేరిన సుమన్ కుమార్ కు వైట్ కాలర్ నేరాలను విచారించడంలో అద్భుతమైన రికార్డుంది. 2002లో ఆయన బెస్ట్ ఇన్వెస్టిగేటింగ్ ఆఫీసర్ గా గోల్డ్ మెడల్ నూ అందుకున్నారు. 2008లో పోలీస్ మెడల్ ను, 2013లో ఔట్ స్టాండింగ్ ఇన్వెస్టిగేటర్ గా రాష్ట్రపతి పురస్కారాన్నీ స్వీకరించారు. ఆయనకున్న సర్వీస్ రికార్డే, మాల్యా కేసును 2015లో ఆయన టేబుల్ పైకి చేర్చింది. ఈ కేసు విచారణ దశలో ఒక్కో లొసుగూ బయటపడుతూ ఉండగానే, విషయం అర్థం చేసుకున్న మాల్యా, 2016లో దేశం నుంచి పారిపోయారు.

ఆ సమయంలో సీబీఐపైనా విమర్శలు వచ్చాయి. మాల్యా పారిపోవడానికి ప్రభుత్వం సహకరించిందన్న ఆరోపణలూ వెల్లువెత్తాయి. దీంతో సీబీఐ స్పెషల్ ఇన్వెస్టిగేషన్ టీమ్ ను ఏర్పాటు చేసి, అదనపు డైరెక్టర్ రాకేశ్ ఆస్థానాకు బాధ్యతలు అప్పగించగా, ఆయన సుమన్ కుమార్ తో కలిసి కేసును ముందుకు తీసుకెళ్లారు. లండన్ కోర్టుల్లో పిటిషన్లు వేసినప్పటి నుంచి వీరు, ఒక్క విచారణకు కూడా గైర్హాజరు కాలేదు. వెస్ట్ మినిస్టర్స్ కోర్టు నుంచి సుప్రీంకోర్టు వరకూ తమ వద్ద ఉన్న ఆధారాలతో మాల్యా దోషేనని నిరూపించేందుకు ప్రయత్నించి, విజయవంతం అయ్యారు. ఇప్పుడు సుమన్ కుమార్ కృషికి సీబీఐ ఉన్నతాధికారుల నుంచి ప్రశంసల వర్షం కురుస్తోంది.
Tags: Suman Kumar,CBI,Mallya,Vijay Malya,Extradition

Uber, Corona Virus, Employees

3700 మంది ఉద్యోగులను తొలగించిన ఉబెర్

కరోనా వైరస్ లాక్‌డౌన్ నేపథ్యంలో నష్టాలపాలవుతున్న సంస్థలు ఉద్యోగులను దారుణంగా తొలగిస్తున్నాయి. కోవిడ్-19 మహమ్మారి కారణంగా ఎదురవుతున్న సవాళ్లను అధిగమించేందుకు చాలా సంస్థలు తమ ఉద్యోగులను చాలా వరకు తొలగిస్తున్నాయి. తాజాగా ట్యాక్సీ రైడింగ్ యాప్ ఉబెర్ కూడా అదే బాటపట్టింది. వీడియో కాన్ఫరెన్సింగ్ యాప్ జూమ్ ద్వారా నిన్న 3700 మంది ఉద్యోగులతో మాట్లాడిన ఆ సంస్థ కస్టమర్ సర్వీస్ హెడ్ రఫిన్ చావెలీ.. సంస్థలో వారికి ఇదే చివరి రోజుని, అందరినీ ఉద్యోగాల్లోంచి తొలగిస్తున్నట్టు చెప్పారు.

కేవలం మూడు నిమిషాలపాటు సాగిన ఈ కాల్‌ ద్వారా తమ ఉద్యోగుల్లో 14 శాతం మందిని తొలగించడంపై ఉద్యోగులు మండిపడుతున్నారు. ముందస్తు నోటీసు లేకుండా, అందరికీ ఒకేసారి కాల్ చేసి తొలగించడం ఏంటని ప్రశ్నిస్తున్నారు. కాగా, కరోనా మహమ్మారి ప్రభావం ఉబెర్‌పై తీవ్రంగా పడింది. ఈ ఏడాది తొలి త్రైమాసికంలో ఉబెర్ 2.9 బిలియన్ డాలర్ల నికర నష్టాన్ని మూటగట్టుకుంది.
Tags: Uber, Corona Virus, Employees

Corona Virus, Blood Group, Southern University, COVID-19, Wuhan China

ఈ బ్లడ్ గ్రూప్ వ్యక్తులకు కరోనా ముప్పు ఎక్కువంటున్న చైనా పరిశోధకులు

చైనాలో కొన్నినెలల కిందట ఓ కొత్త వైరస్ వ్యాపిస్తోందన్న వార్తలను అప్పట్లో ప్రపంచ దేశాలు తేలిగ్గానే తీసుకున్నాయి. కానీ తమ వరకు వస్తే గానీ తెలియదన్నట్టు ఇప్పుడు ప్రతి దేశం కరోనా మహమ్మారిని ఎదుర్కోవడానికి సర్వశక్తులూ ఒడ్డుతోంది.

ప్రపంచవ్యాప్తంగా ఇప్పటివరకు 43 లక్షల మందికి పైగా కరోనా బారినపడగా, 2.93 లక్షల మంది కరోనాతో మృత్యువాత పడ్డారు. ఓవైపు ఈ వైరస్ భూతాన్ని కట్టడి చేసే సరైన వ్యాక్సిన్ కోసం భారీ ఎత్తున పరిశోధనలు సాగుతుండగా, మరోవైపు సమర్థవంతమైన ఔషధాల కోసం ప్రయోగశాలల్లో ముమ్మర ప్రయత్నాలు జరుగుతున్నాయి.

ఈ నేపథ్యంలో చైనాలోని సదరన్ యూనివర్సిటీ ఆఫ్ సైన్స్ అండ్ టెక్నాలజీ పరిశోధకులు ఆసక్తికర అంశాలు వెల్లడించారు. కరోనా వైరస్ కొన్నిరకాల బ్లడ్ గ్రూపులపై తీవ్ర ప్రభావం చూపుతోందని, మరికొన్ని రకాల బ్లడ్ గ్రూపులపై ఓ మోస్తరు ప్రభావం మాత్రమే చూపుతోందని గుర్తించారు. ఈ మేరకు ఓ అధ్యయనంలో వెల్లడించారు. ‘ఏ’ బ్లడ్ గ్రూపు కలిగిన వ్యక్తులకు కరోనా నుంచి అధిక ముప్పు ఉంటుందని, వారికి సోకితే తప్పకుండా ఆసుపత్రికి వెళ్లాల్సినంత తీవ్ర లక్షణాలు కనిపిస్తాయని పరిశోధకులు వివరించారు. ఇక, ఓ బ్లడ్ గ్రూపు కలిగిన వ్యక్తులకు కరోనా సోకినా వారిలో ఓ మోస్తరు లక్షణాలే కనిపిస్తాయని, పెద్దగా ఆసుపత్రికి వెళ్లాల్సిన అవసరం కూడా ఉండదని అధ్యయనంలో పేర్కొన్నారు.

ఈ అధ్యయనం కోసం సదరన్ యూనివర్సిటీ పరిశోధకులు 2,173 మంది కరోనా రోగులపై పరిశోధన చేపట్టారు. ఆసుపత్రుల పాలైన కరోనా రోగుల్లో ‘ఏ’ బ్లడ్ గ్రూపు వారే ఎక్కువగా ఉండగా, ‘ఓ’ గ్రూపు వారు తక్కువ సంఖ్యలో ఉన్నట్టు వెల్లడైంది. దీనిపై వర్సిటీ పరిశోధకులు మాట్లాడుతూ, తమ అధ్యయనం భవిష్యత్ పరిశోధనలకు మరింత ఊతమిస్తుందని భావిస్తున్నట్టు తెలిపారు. ఏ, బీ, ఓ బ్లడ్ గ్రూపుల వ్యక్తులకు కరోనా సోకే తీరులో తారతమ్యాలు ఎందుకున్నది గుర్తిస్తే పరిశోధనల్లో మరింత పురోగతి సాధ్యమవుతుందని అభిప్రాయపడ్డారు.
Tags: Corona Virus, Blood Group, Southern University, COVID-19, Wuhan China

Suman Kumar,CBI,Mallya,Vijay Mallya,Extradition

విజయ్ మాల్యాకు చుక్కెదురు… ఇక భారత్ కు అప్పగింతే తరువాయి!

ఒకప్పుడు లిక్కర్ వ్యాపారాన్ని శాసించి, కింగ్ ఫిషర్ బ్రాండుతో అనేక వ్యాపార సామ్రాజ్యాలు నిర్మించిన విజయ్ మాల్యాకు లండన్ కోర్టులో మరోసారి చుక్కెదురైంది. తనను భారత్ కు అప్పగించవద్దని కోరుతున్న మాల్యా యూకే హైకోర్టును ఆశ్రయించగా, ఏప్రిల్ 20న ఆ పిటిషన్ కొట్టివేతకు గురైంది.

దాంతో, తాను సుప్రీంకోర్టులో పిటిషన్ వేసేందుకు అనుమతి ఇవ్వాలంటూ న్యాయస్థానానికి దరఖాస్తు చేసుకోగా, తాజాగా ఆ దరఖాస్తును కూడా న్యాయస్థానం తిరస్కరించింది. దాంతో విజయ్ మాల్యాకు న్యాయపరమైన అవకాశాలన్నీ ముగిసినట్టయింది. ఈ నేపథ్యంలో, కోర్టు ఇచ్చిన తీర్పు ప్రతిపై బ్రిటన్ హోంశాఖ కార్యదర్శి ప్రీతి పటేల్ అధికారిక ముద్రవేయడమే తరువాయిగా కనిపిస్తోంది. ఈ మొత్తం ప్రక్రియ 28 రోజుల్లో పూర్తికానుండగా మాల్యా భారత్ కు రాకతప్పదని తెలుస్తోంది.
Tags: Vijay Mallya, UK Extradition, India, King fisher

KGF, Thieves, Iron, Death, Oxygen

కర్ణాటక కేజీఎఫ్ గనుల్లో చోరీకి యత్నం… ఊపిరాడక ముగ్గురు దొంగల మృతి!

లాక్ డౌన్ అమల్లో ఉన్న వేళ కూడా ఐదుగురు దొంగలు చోరీకి యత్నించడం, వారిలో ముగ్గురు మరణించడం కలకలం రేపింది. కర్ణాటకలోని కోలార్ గోల్డ్ ఫీల్డ్ (కేజీఎఫ్) గనుల్లో ఈ ఘటన జరిగింది. కుప్పం సరిహద్దు ప్రాంతానికి సమీపంలో ఉన్న కేజీఎఫ్ గనుల్లో ఇనుప సామగ్రి దొంగతనం చేసేందుకు ఐదుగురు వ్యక్తులు వెళ్లారు.

వారు గనుల్లో 100 అడుగుల లోతుకు వెళ్లగా, అక్కడ ఆక్సిజన్ లభ్యత తగ్గిపోవడంతో వారు ఊపిరందక ఉక్కిరిబిక్కిరయ్యారు. వారిలో ముగ్గురు అక్కడే ప్రాణాలు వదలగా, మరో ఇద్దరి పరిస్థితి విషమంగా మారింది. దొంగలు పెద్దగా కేకలు వేయడంతో పోలీసులు, ఫైర్ సిబ్బంది అక్కడికి చేరుకుని ఇద్దరిని రక్షించి ఆసుపత్రికి తరలించారు.

కాగా, లాక్ డౌన్ అమల్లో ఉండడంతో గత కొన్నివారాలుగా కోలార్ ప్రాంతంలో బంగారం వెలికితీత పనులు నిలిచిపోగా, కేజీఎఫ్ గనులు మూతపడి ఉన్నాయి. ఇదే అదనుగా చోరీ చేద్దామని ప్రయత్నించిన దొంగలు ప్రాణాలకే ముప్పుతెచ్చుకున్నారు.
Tags: KGF, Thieves, Iron, Death, Oxygen

లాక్ డౌన్ నేపథ్యంలో విజయవాడ చేరుకున్న తొలి ప్రయాణికుల రైలు

దేశంలో మూడో విడత లాక్ డౌన్ కొనసాగుతున్న తరుణంలో ఢిల్లీ నుంచి వివిధ నగరాలకు ప్రయాణికుల రైళ్లను అనుమతించిన సంగతి తెలిసిందే. ఈ నేపథ్యంలో న్యూఢిల్లీ నుంచి విజయవాడకు ప్రయాణికుల రైలు వచ్చింది. లాక్ డౌన్ పరిస్థితులు ఉత్పన్నం అయ్యాక విజయవాడ వచ్చిన తొలి ప్రయాణికుల రైలు ఇదే.

ఈ మధ్యాహ్నం న్యూఢిల్లీ-చెన్నై ఎక్స్ ప్రెస్ రైలు విజయవాడ జంక్షన్ కు చేరుకుంది. ఢిల్లీ సహా వివిధ రాష్ట్రాల నుంచి 318 మంది ప్రయాణికులు విజయవాడకు వచ్చారు. ఈ రైలు మధ్యప్రదేశ్, మహారాష్ట్ర, తెలంగాణ రాష్ట్రాల మీదుగా ఏపీలో ప్రవేశించింది. ఇదే ఎక్స్ ప్రెస్ రైలులో విజయవాడ నుంచి 282 మంది ప్రయాణికులు చెన్నై వెళ్లారు. కాగా, విజయవాడలో దిగిన ప్రయాణికులకు కరోనా పరీక్షలు చేసి ప్రత్యేక బస్సుల్లో క్వారంటైన్ కేంద్రాలకు తరలించనున్నారు.
Tags: Passenger Train, Vijayawada, Lockdown, New Delhi, Chennai